Puketāpapa – He Taunga Paihikara Puketāpapa – He Taunga Paihikara

E ai ki ngā whakahokinga kōrero a te hapori, he kaha te tautoko kia tokomaha ake ngā tāngata hei paihikara i ngā tūāhanga ara-kākāriki o te wā tonu nei, i a rātou e whakapakari tinana ana, e noho haumaru tonu ana hoki i te rohe o Puketāpapa. Mā roto i te mahi tahi ki te hapori, ki ngā kaimahi o te whānau o Te Kaunihera, ki a Kāinga Ora, tae noa ki ngā kura, ka oti te hanga tētahi taunga paihikara ā-rohe pātata hei pārekarekatanga mō te katoa.

Kua māmā tonu ake te paihikara haere i Puketāpapa nā te āwhina o roto i te kaupapa e kīia nei ko He Taunga Paihikara. He kaupapa manea tēnei mea te ranga paihikara hei whakatītina i ngā tamariki tokomaha ake me ngā whanaunga kia paihikara haere i te pūtahitanga ara paihikara e honohono ana i te rohe.

Te horopaki

Nā te whakamātautautanga o tētahi Ranga Paihikara, i whakahaeretia rā e Global Hope, i te tau 2019, ka kitea te hiahia kia whakaroatia anō tēnei momo wheako. E matapaetia ana te tāpua o te tipuranga o te taupori i te rohe nā te korahi o ngā whanaketanga o te wā nei, o anamata hoki, e pā ana ki te whakatū whare noho, otiia, ki ērā e whakatūria ana e Kāinga Ora. Nō reira, mā te turaki haere i ngā taunahua e pā ana ki te paihikara a te tangata, ka āwhinatia te whakaititanga o ngā whakaputanga haukino, te whakapainga ake hoki o te pakari ā-manawa, te hauora me te oranga anō hoki o te hapori.

Mā te rawapuni o te rohe pātata, mā Roskill Bike Kitchen, e haratau nei tōna whakatūnga ki Wesley me Roskill South, ka tautokona te hapori ā haere ake nei, ā, mā taua rawapuni rā hoki e whakawātea te ara e toro ai te tangata ki te paihikara. Ka piri mātou ki ngā kura 10 o te rohe pātata ki te mahi tahi ki te whakatītina i ngā tamariki kia eke paihikara atu ki te kura, i te kura hoki, mā ngā ara ngātahi kei tua atu o ngā rori.

I whakatakotohia i te pūrongo o Fit for Growth ngā māramatanga e whakaatu ana i tō te hapori tōmina: “Kia haumaru ngā wāhi mō ngā tamariki i a rātou e tipu ana, e tākaro ana hoki. I rongo mātou i ngā tamariki e kōrero nei i ō rātou hiahia ki te puta ki waho, ki te whakamahi hoki i ngā wāhi huihui o te rohe pātata e kākāriki ana kia utu kore te tākaro i te taha o ō rātou hoa me te whānau. Tūhono ai ngā tamariki ki ērā kei ō rātou anō rohe e tino pātata ana – kei ngā tiriti e torutoru nei te pūtoro, kei ngā wāhi rānei e tata ana, pēnei i tō te rohe pātata papa rēhia, i tōna papa tākaro, i te whenua rānei o tōna kura. Ko ngā mātua i hiahia ki te mōhio, e haumaru ana ā rātou tamariki, ā, e tata ana rātou ki te kāinga i a rātou e tākaro ana. I nui tonu te māharahara ki te mātotorutanga me te maha haeretanga o ngā waka i ngā rori nā te apiapitanga.

Te tautoko ā-rohe pātata

I tua atu o te tautoko mai a ngā rōpū o te hapori me ngā kura o te rohe pātata, e piri ana a Auckland Transport ki te Poari ā-Rohe o Puketāpapa ki te mahi tahi e tutuki ai te kaupapa nei.

Ka tutuki i te kaupapa o He Taunga Paihikara ki Puketāpapa ngā whāinga matua o roto i te Mahere a Te Poari ā-Rohe o Puketāpapa mō ngā tau o te 2020-2023 mā te:

Whakarite i ētahi momo kōwhiringa ā-waka e iti ake nei te whakapokenga, pēnei i te huri ki te ranga motukā, ki te whakaiti i ngā haerenga takitahi, ki te haere mā te waka tūmatanui, ki te hīkoi me te paihikara
Haumi ki ngā kaupapa ka hāngai ki te haumaru me ngā mōhiotanga e pā ana ki te paihikara

Ngā kōrero mō te hōtaka

Noho ai a He Taunga Paihikara i raro i te hōtaka o Ngā Tiriti Ngangahau. He pūtea hou e $3 miriona te nui, kua whakaritea kia tukuna e Auckland Transport hei ngā tau e toru tuatahi o Te Tāruke-ā-Tāwhiri: tā Te Kaunihera o Tāmaki Makaurau mōkī mō te 10-tau e pā ana ki ngā mahi ā-taiao.

Ka kapi i te hōtaka nei ngā kaupapa e whitu puta noa i Tāmaki Makaurau, e whai nei kia heke ngā whakaputanga haukino i ngā waka, mā te whakapai ake i te wātea o ngā huarahi ki ngā āhuatanga me ngā tūāhanga ā-mātātoa (pēnei i te paihikara me te hīkoi). I wātea te huarahi kia tukuna he tono e ngā poari ā-rohe, e Te Kaunihera o Tāmaki Makaurau, me ngā Whakahaere Awhenga a Te Kaunihnera (CCOs). I wātea hoki tēnei huarahi ki ngā mana whenua mā ngā hui torotoro a AT.

He mea arotake ngā tono i eke rā ki ngā taumata o te paearu whakauru i runga i ngā whāinga o te hōtaka e Mātāmua ana, e Mātāmuri ana hoki.

Ngā whāinga mātāmua

Whakaitihia te whakaputanga o ngā haukino i ngā waka, ā, whakapaingia ake te kounga o te hau takiwā i waho o te puku o te tāone mā te whakatītina kia tahuri ki te hīkoi me te paihikara, mā roto anō i te hanga kia nui ake ngā tiriti whakararata tāngata.
Uruparetia te hīkaka o te rohe kia tū ngā tiriti whakararata tāngata mā te kawe i ngā mahi i ngā wāhi e kaha ana te tautoko a te poari ā-rohe me te hapori.

Ngā whāinga mātāmuri

Whakatītinatia te whakamahinga o ngā kaupapa, e taea nei te tuku kia tere, kia iti tonu te utu, me te whai hononga hoki ki ngā pūtea o te wā nei e pūmau ai te rongoā ka whakaritea, mehemea rā ka tika te whakamātautautanga (hei tauira, ngā kaupapa ka whai wāhi atu ki te Regional Land Transport Plan).
Tautokona ngā hua ka puta hei painga mō te Māori, hei tauira, mā te whakatītina kia āta whai wāhi atu te Māori, mā te whakapai ake i ngā huarahi ki ngā marae, ki ngā kura, ki ngā kōhanga, ki ngā wāhi mahi, me ngā ratonga, e iti ai te whakaputanga o te haukino.